बथनाहामा भीषण दुर्घटना: मोटरसाइकल ठोक्किँदा आगलागी, ३ विद्यार्थीको जलेर मृत्यु
महोत्तरी, बर्दिबास। जलेश्वर–बर्दिबास सडकखण्ड अन्तर्गत एकडारा गाउँपालिका–५ बथनाहा गाउँमा आज बिहान दुई मोटरसाइकल एकआपसमा ठोक्किँदा आगलागी भई ३ जना विद्यार्थीको घटनास्थलमै जलेर मृत्यु भएको छ।
प्रहरीका अनुसार विपरीत दिशाबाट आइरहेका दुई मोटरसाइकल ठोक्किएपछि दुवैमा आगो लागेको थियो। आगलागी यति तीव्र थियो कि मोटरसाइकल पूर्ण रूपमा जलेर नष्ट भएका छन् भने नम्बर प्लेटसमेत चिनिन नसक्ने अवस्थामा पुगेको छ।
घटनामा थप ३ जना गम्भीर घाइते भएका छन्। घाइतेहरूको जलेश्वरस्थित प्रादेशिक अस्पतालमा उपचार भइरहेको जिल्ला प्रहरी कार्यालय महोत्तरीका प्रहरी नायब उपरीक्षक शैलेन्द्र भट्टले जानकारी दिएका छन्।
मृतक तथा घाइतेको पहिचान हालसम्म खुल्न सकेको छैन। प्रारम्भिक जानकारी अनुसार मृतकहरू एसईई परीक्षा दिएर फर्किरहेका विद्यार्थी रहेको बताइएको छ।
प्रहरीले घटनाबारे थप अनुसन्धान भइरहेको जनाएको छ।