साम्राज्ञी मोक्तान बनिन् १८ औं मिस तामाङ
१८ माघ, काठमाडौं । काठमाडौं बौद्धकी साम्राज्ञी मोक्तानले १८ औं मिस तामाङको ताज पहिरिएकी छिन् । शनिबार काठमाडौंको भृकुटीमण्डपस्थित नेपाल पुलिस क्लबको सभाहलमा सम्पन्न ग्रान्ड फिनालेमा १६ जना प्रतिस्पर्धीलाई पछि पार्दै उनले उपाधि हात पारेकी हुन् ।
विजेता साम्राज्ञी मोक्तानलाई १७ औं मिस तामाङ अन्जु थोकरले ताज पहिराएकी थिइन् । उपाधिसँगै मोक्तानले नगद ५० हजार रुपैयाँ तथा विभिन्न गिफ्ट ह्याम्पर पुरस्कार प्राप्त गरेकी छिन् ।
मोक्तानले मुख्य उपाधिसँगै मिस कन्फिडेन्ट र भ्युअर चोइस टाइटलसमेत जित्न सफल भइन् । निर्णायक चरणमा ‘नेपाललाई सांस्कृतिक रूपमा विश्वमा चिनाउन के–के गर्नुहुन्छ ?’ भन्ने प्रश्नको प्रभावशाली उत्तर दिँदै उनले निर्णायकको मन जितेकी थिइन् ।
उत्तरमा उनले नेपाल विविधतायुक्त भए पनि एकताको प्रतीक देश भएको बताइन् । ‘नेपाल बहुजातीय, बहुभाषिक र बहुधार्मिक मुलुक हो । हाम्रो विविधताभित्रको एकता र धर्मनिरपेक्षताले हामीलाई गर्व महसुस गराउँछ,’ उनले भनिन्, ‘सेलोको धड्कन र साकेलाको धुनले हामीलाई एक बनाएको छ । १२० भन्दा बढी भाषाहरू बिना कुनै अवरोध बोलिन्छन् । हाम्रो पहिरनको सुन्दरता र लालित्यले सांस्कृतिक महत्व बोकेको छ । यही विशेषतालाई विश्वसामु प्रस्तुत गरी नेपाललाई चिनाउन चाहन्छु ।’