सुनको भाउमा एकैदिन भारी गिरावट, अन्तर्राष्ट्रिय बजारको असर नेपाली बजारमा
समाचार:
१७ माघ, काठमाडौं । यस साता लगातार नयाँ रेकर्ड बनाउँदै बढिरहेको सुनको भाउ शुक्रबार एकाएक घटेको छ । नेपाली बजारमा बिहीबार तोलामा २० हजार ५ सय रुपैयाँले बढेर तीन लाख ३९ हजार ३ सय रुपैयाँ पुगेको सुनको मूल्य शुक्रबार सोही परिमाणले घटेर तीन लाख १८ हजार ८ सय रुपैयाँमा झरेको छ ।
सुनचाँदीको भाउमा देखिने यस्तो उतारचढाव नेपाली बजारको मात्र प्रभाव नभई अन्तर्राष्ट्रिय बजारसँग प्रत्यक्ष रूपमा जोडिएको हुन्छ । अन्तर्राष्ट्रिय बजारमा बिहीबारसम्म प्रतिऔँस पाँच हजार ६ सय डलरसम्म पुगेको सुनको मूल्य शुक्रबार घटेर चार हजार ८ सय ९५ डलरमा झरेको छ ।
विश्लेषकहरूका अनुसार अमेरिकी डलर बलियो बन्दा सुनको मूल्यमा गिरावट आएको हो । अमेरिकी राष्ट्रपति डोनाल्ड ट्रम्पले फेडेरल रिजर्भको प्रमुखमा केभिन वार्सलाई मनोनयन गरेपछि फेडको राजनीतिक स्वतन्त्रताबारेको चिन्ता कम भएको र त्यसको असर डलर मजबुत हुन पुगेको बताइएको छ ।
यसअघि ट्रम्प राष्ट्रपति निर्वाचित भएपछि डलर सूचकांक कमजोर हुँदा लगानीकर्ता सुनतर्फ आकर्षित भएका थिए । भूराजनीतिक तनाव र आर्थिक अनिश्चितताका कारण पछिल्लो १२ महिनामा सुनको मूल्य झण्डै ९० प्रतिशतले बढेको थियो ।
तर हाल डलर सूचकांक एकैदिन ०.९ प्रतिशतले बढेपछि लगानीकर्ताको ध्यान पुनः डलरतर्फ फर्किन थालेको विश्लेषकहरूको भनाइ छ । आगामी दिनमा पनि अन्तर्राष्ट्रिय आर्थिक तथा भूराजनीतिक अवस्थाका कारण सुनको भाउमा थप उतारचढाव देखिन सक्ने अनुमान गरिएको छ ।