अमेरिकामा पहिलो पटक ‘फ्लेस–इटिङ परजीवी’ सङ्क्रमणको पुष्टि
वासिङ्टन – अमेरिकामा पहिलो पटक मानिसमा ‘मासु खाने परजीवी’ (फ्लेस–इटिङ स्क्रुवर्म) सङ्क्रमण भएको आधिकारिक पुष्टि भएको छ। स्वास्थ्य विभागका अनुसार, एल साल्भाडोरबाट फर्किएका एक बिरामीमा न्यू वर्ल्ड स्क्रुवर्म (NWS) मियासिस नामक रोग पाइएको हो। यस घटनाले विज्ञहरूलाई सचेत बनाएको छ।
गत अगस्ट ४ मा पुष्टि भएको यो केसबारे अमेरिकी स्वास्थ्य तथा मानव सेवा विभाग (HHS) र रोग नियन्त्रण तथा निवारण केन्द्र (CDC) ले विस्तृत अनुसन्धान सुरु गरेका छन्। प्रारम्भिक विश्लेषणमा भने यसले व्यापक सार्वजनिक स्वास्थ्य संकट निम्त्याउने सम्भावना “अत्यन्तै न्यून” रहेको स्पष्ट गरिएको छ।
कसरी हुन्छ संक्रमण?
यो रोग विशेष प्रकारका परजीवी मक्खीका लार्भा (म्यागोट्स) बाट सर्छ। यी लार्भाले जिउँदो मासु खाइदिने भएकाले यसलाई ‘फ्लेस–इटिङ परजीवी’ भनिन्छ।
- सामान्यतया चौपायामा बढी देखिने भए पनि
- मानिसमा खुला घाउ भएको अवस्थामा सजिलै प्रवेश गर्न सक्छ।
- संक्रमित जनावर वा प्रभावित क्षेत्रको सम्पर्कमा आउनेहरू उच्च जोखिममा पर्छन्।
भौगोलिक फैलावट
यो परजीवी प्रायः दक्षिण अमेरिका र क्यारिबियन क्षेत्रमा पाइन्छ। पछिल्ला वर्षहरूमा मध्य अमेरिकाका सबै देश (मेक्सिकोसहित) मा यसको केस पुष्टि भइसकेको छ।
जोखिम र तयारी
CDC का अनुसार अमेरिकामा हाल तत्कालीन खतराको अवस्था छैन। तर, प्रभावित मुलुकहरू भ्रमण गर्ने वा चौपायासँग प्रत्यक्ष सम्पर्कमा रहने मानिसलाई विशेष सतर्कता अपनाउन सुझाव दिइएको छ।