प्रहरी खेलाडी र प्रशिक्षकका लागि ठूलो सुविधा : रासन रकम दोब्बर!
काठमाडौं, ३ भदौ — नेपाल प्रहरीले आफ्ना खेलाडी तथा प्रशिक्षकहरूलाई ठूलो सुविधा दिने निर्णय गरेको छ। अबदेखि जुडो, कराँते, तेक्वान्दो, ड्रिल र पिटी प्रशिक्षक तथा खेलाडीहरूले पाउँदै आएको राशन वापतको रकम दोब्बर पाउने भएका छन्। प्रहरी प्रधान कार्यालयका अनुसार खेलाडी र प्रशिक्षकहरूको पोषणयुक्त डाइट सुनिश्चित गर्नका लागि १०० प्रतिशत थप राशनको व्यवस्था गरिएको हो।
यसका लागि आवश्यक बजेटसमेत विनियोजन भइसकेको छ। यो निर्णयसँगै खेलकुद क्षेत्रमा संलग्न प्रहरी खेलाडी र प्रशिक्षकहरूको मनोबल उच्च हुने अपेक्षा गरिएको छ। प्रहरी नेतृत्वले यसलाई खेलाडीमैत्री नीतिको ठोस कदमका रूपमा व्याख्या गरेको छ।
विशेषज्ञहरूले यस निर्णयले प्रहरी खेलकुदलाई अझ सशक्त बनाउने र अन्तर्राष्ट्रिय स्तरमा प्रतिस्पर्धी बनाउन सहयोग पुर्याउने धारणा व्यक्त गरेका छन्।